राजनीतिक आबद्धता
तुलसीपुरको महेन्द्र माविमा १० कक्षा अध्ययन गरिरहेका बेला प्रशासनको दमन भएपछि उनी अध्ययनका लागि भारत गए । भारतको बनारसबाट बोर्ड परीक्षा हुादै बीकमसम्मको अध्ययन गरे । २०३५ सालबाट विद्यार्थी राजनीति सुरु गरेका पोखरेल २०३६ सालको विद्यार्थी आन्दोलनमा संलग्न भएका थिए । २०३७ सालमा पहिलोपटक जेल परे । विद्यार्थी राजनीतिकै क्रममा पटकपटक जेल परेका उनले भारतमा अध्ययन गर्दा अखिल भारत नेपाली स्वतन्त्र विद्यार्थी युनियन गठन गरी प्रवासी विद्यार्थीहरूको हकहितको पक्षमा संघर्ष थाले । त्यसको उनी अध्यक्ष भए । मदन भण्डारीको सम्पर्कमा रहेपछि उनी २०४२ सालमा नेपाल फर्किएर विद्यार्थी राजनीतिमा संगठित र क्रियाशील भए । सुरुमा अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)को वाग्मती अञ्चल कमिटीमा आबद्ध भएर काम गरे । २०४५ सालमा त्रिभुवन विश्वविद्यालय केन्द्रीय क्याम्पसको स्ववियु सभापति निर्वाचित भए । २०४७ सालमा अनेरास्ववियुको केन्द्रीय अध्यक्ष भए ।
२०५१ सालमा एमालेको प्रचार विभाग प्रमुख भए । २०५४ मा नेपालगन्जमा सम्पन्न छैटौं महाधिवेशनबाट केन्द्रीय सदस्य भए । २०५९ मा जनकपुरमा सम्पन्न सातौं महाधिवेशनबाट पुन: केन्द्रीय सदस्य भए । २०६५ मा बुटवलमा सम्पन्न आठौं महाधिवेशनबाट केन्द्रीय सचिव भए । २०७१ मा काठमाडौंमा सम्पन्न नवौं महाधिवेशनमा उपमहासचिवमा पराजित भए । त्यतिबेला स्थायी कमिटी सदस्य भएर काम गरे । २०७८ मंसिरमा चितवनमा सम्पन्न दसौं महाधिवेशनबाट उनी सर्वसम्मत महासचिवमा निर्वाचित ।