राजनीतिक आबद्धता
सूर्यमान दोङको राजनितिक यात्रा २०४४ सालबाट सुरु भयो । ३५ वर्षदेखि नेकपा माओवादी केन्द्रकै राजनीतिमा सक्रिय रहेका दोङ माओवादी केन्द्रको पोलिटब्युरो सदस्य हुन् । विभिन्न समयमा जिल्ला इन्चार्जको समेत भूमिका निर्वाह गर्दै २०६३ सालमा पार्टी केन्द्रीय समिति सदस्य समेत भएका थिए । निरन्तर केन्द्रीय सदस्य हुँदै हाल आठौं महाधिवेशनबाट केन्द्रीय सदस्य र पोलिटब्युरो सदस्य रहेका उनी काभ्रे जिल्ला इन्चार्जको जिम्मेवारी समेत निर्वाह गरिरहेका छन् ।
संसदीय यात्रा
माओवादी जनयुद्धको जगमा सम्पन्न २०६२/०६३ को जनआन्दोलन पछि पुनर्स्थापित संसद्मा उनी सदस्य थिए । २०६४ सालमा सम्पन्न पहिलो संविधानसभा सदस्य निर्वाचनमा २८ हजार ८ सय मत ल्याई विजयी भएका दोङले डा. बाबुराम भट्टराई पछिको लोकप्रिय मत ल्याएका थिए । २०६८ सालमा उर्जा राज्यमन्त्री समेत भएका उनले उर्जा क्षेत्रमा निकै काम गरेका छन् । २०७० सालमा सम्पन्न संविधानसभा निर्वाचनमा भने झिनो मतले पराजित भएका थिए ।
विशेष जिम्मेवारी
२०५७ सालमा उप–क्षेत्रीय ब्युरो सदस्य, २०५८ सालमा क्षेत्रीय ब्युरो सदस्यमा चयन भएका थिए । साथै २०५८ मा काभ्रे जिल्ला सेक्रेटरी समेत भए । जनमुक्ति सेनाको कम्पनी कमिसार, बटालियन कमिसार हुँदै २०५९ सालमा रामेछाप, सिन्धुली र काभ्रेको जनमुक्ति सेना नेपालको रेजिनल कमान्डको कमिसारको भूमिका समेत उनले निर्वाह गरेका थिए ।
राजनीतिक घटनाक्रम
पञ्चायत विरोधी संयुक्त जनआन्दोलन संयोजन समितिको नेतृत्वमा चालेको क्रान्तिकारीहरुको आन्दोलनमा दोङ सहभागी भएका थिए । ‘प्रतिक्रियावादी राज्यसत्तालाई ध्वंश गर्दै नयाँ जनवादी राज्यसत्ता स्थापना गरौं’ भन्ने मूल नाराका साथ २०५२ साल फागुन १ गतेका दिन सुरु भएको जनयुद्धको पहिलो मोर्चा सिन्धुली गढी प्रहरी चौंकी आक्रमणमा उनी सहभागी भएका थिए ।