२०६३ सालको हिउँदको मधेस विद्रोहका बेला महन्थ ठाकुर मन्त्री थिए । जनआन्दोन–२ को सफलतापछि नेपाली कांग्रेसका सभापति गिरिजाप्रसाद कोइराला प्रधानमन्त्री बनेका थिए । कोइराला मन्त्रिपरिषद्का वरिष्ठ मन्त्री थिए महन्थ । मधेसका वरिष्ठ कांग्रेस नेता महन्थले ०६४ सालको संविधानसभा निर्वाचनअघि मन्त्रीबाट राजीनामा मात्रै गरेनन्, नेपाली कांग्रेस पनि त्यागे । र, मधेसमा आधारित राजनीति गर्ने उद्देश्यले तराई–मधेस–लोकतान्त्रिक पार्टी/तमलोपा गठन गरी संविधानसभामा भाग लिए ।

पछि सद्भावना पार्टीका विभिन्न घटकहरूसित मिलेर राष्ट्रिय जनता पार्टी÷राजपाको स्थापना भएपछि त्यसको अध्यक्ष मण्डलमा पनि महन्थ रहे । वास्तवमा, राजपाको अध्यक्ष मण्डलमा मधेस केन्द्रित ६ दल भए पनि त्यसको नेतृत्वचाहिँ सबैले पाका नेता महन्थलाई नै माने ।

२०७७ सालमा उपेन्द्र यादव नेतृत्वको समाजवादी पार्टी र महन्थ ठाकुर नेतृत्वको राष्ट्रिय जनता पार्टी (राजपा) बीच एकीकरण भई जनता समाजवादी पार्टी (जसपा) बन्यो । त्यसको एकवर्षपछि महन्थहरू निस्केर अलग्गै लोकतान्त्रिक समाजवादी पार्टी (लोसपा) गठन गरे । यसको अध्यक्ष महन्थ ठाकुर हुन् भने चुनाव चिन्ह ‘साइकल’ हो ।